Leviticus 27
A Nita Muholi Lakea ne BAKOVI DAGI
1E BAKOVI DAGI i takia e Moses, 2ge taki e huriki a Israel, ge ta maea, “A viri i ta muholi ge habi ranga viri lakea nau, ge habi na prister ranga moni ge vakatorea a nita muholi vona. 3Ge pasia a mapana bakovi o ngatavine vona ge maea: a bakovi i tahoka a pida i ravulu rua, i harena na pida i ravulu polotara (60), ni gi kona na moni silva i 50, i ramai a nimavana moni ▼ na mailo ne BAKOVI DAGI. 4A ngatavine i tahoka a pida i ravulu rua, i harena na pida i ravulu polotara (60), ni gi kona na moni silva i 30. 5A viri i tahoka a pida i lima, i harena na pida i ravulu rua, a bakovi ni gi kona na moni silva i 20. A ngatavine ni gi kona na moni silva i ravulu. 6A koma i tahoka a keva i taku, i harena na pida i lima, a koma bakovi ni gi kona na moni silva i lima. A koma ngatavine ni gi kona na moni silva i tolu. 7A viri a pida vona i rangi a pida i ravulu polotara (60), a bakovi ni gi kona na silva moni i 15. A ngatavine ni gi kona na silva moni i ravulu. 8Na tahuna a bakovi i ratea a nita tora iea, i uka moni ge kona mule ia, o ge kona mule a turana, a bakovi iea ge lakea na prister. A prister ge kali purua a mapana bakovi iea, bara i kara ni kona.9“Bara bakovi i ta muholi ge habia ne BAKOVI DAGI tara kanirau ge a nihabi, ge habia a kanirau ra a taki mua vona ta mu gu habia. A kanirau maea mu habia ni taba. 10Ra bakovi iea, nahea ge kuloia a kanirau ge habia nau a viri nabatabuna. Nahea ge kuloia a kanirau nabatabuna ge habia nau a viri gavutuvutu. Ia ge rata mavonga, ra kanirau varago nga bara ne nau kunana. 11A kanirau i muto nahea ni gi habi ne BAKOVI DAGI. A kanirau maea ni gi bole lakea taro na prister. 12A prister ge masia a kanirau iea i muto o i kaba, ge takia a mapana. Ra mapana nahea ni gi pulo. 13A bakovi iea i ngaru ge konamulea ra kanirau iea, ge konamulea na moni i takia a prister, ge ru langa tabu ranga ( ).
14“Bara bakovi i habi a ruma vona i malamala lakea ne BAKOVI DAGI, a prister ge matai taroa a ruma iea i kamumu o i hale, lakea a prister ge takia a mapana. Ra mapana nahea ni gi pulo. 15Bara bakovi iea ge ngaru ni konamulea, ge habi nau a mapana ruma, ge ru langa tabu ranga ( ).
16“Bara bakovi i habi ne BAKOVI DAGI a tabekena malala na kabu vona, a prister ge matai kamumua a malala, ge riva a vutuna vit ni gi varo vona a malala iea. A malala iea i kara ni gi varo vona a vutuna vit ge ravulu rua a kilo vona, a mapana malala iea ge a moni silva i ravulu lima (50). 17Bara i habia nau na Pida na Nihabimule a Maki, a mapana ge tabuli mavonga, nahea ni gi pulo lae. 18Pali ia ge habia nau muri na Pida na Nihabimule a Maki, a prister ge gi palupu a maka pida ri tababana, ge bele na pida ni vakoli, ge kali purua a mapana malala iea. 19Bara bakovi i habi a malala vona nau, ia ge ngaru ni konamulea a malala iea, ge konamulea na mapana i takia a prister, ge ru langa tabu ranga ( ). 20Bara i uka ma i konamulea nau a malala iea, o i habia na bakovi tara i konea, ra malala iea i uka ma ni gi kona mule na tahuna a Pida Nivakoli i valai tabu. 21Na tahuna a Pida na Nihabimule a Maki ge bele, a bakovi i konea a malala iea ge habia ne BAKOVI DAGI. Lakea ra malala iea ge tabuli ga malala nau liu, bara habia ne huriki a prister.
22“Bara bakovi i habia ne BAKOVI DAGI a hania i konea, i uka ma a tabeke na malala ne tubuna, 23a prister ge gi kadolu i riva a pida i tababana ge bele vona a Pida na Nihabimule a Maki. Ge takia a mapana malala ge harena vona a pida iea. Na pida iea kunana ge habia na prister a mapana malala. Ra mapana malala i malamala na matane BAKOVI DAGI. 24Na Pida na Nihabimule a Maki, a bakovi ge habi mulea na tahona a malala vona. 25A mapana maki nga ni gi pasi ramai a moni na mailo ne BAKOVI DAGI.
26“Na tahuna mu habia ne BAKOVI DAGI a kanirau, naha ni bolea a tabua na kanirau, a vuhuna a tabua na maka kanirau ne BAKOVI DAGI. A tabua na bulmakau a sipsip, ngi ranga ne BAKOVI DAGI. 27Pali bara tabua i podea a kanirau i muto, mu konamulea na mapana i takia a prister, mu ru langa tabu ranga ( ). Na tahuna a bakovi i marikoi ni konamulea a kanirau, a prister ge takia tara viri ge konea na mapana i takia.
28 b“Na tahuna a bakovi i ru herea tara maki ge ne vona e BAKOVI DAGI, i manga a bakovi, a ngatavine, a kanirau, a malala i bolea ne tubuna, nahea ge takia tara bakovi ge konea, ia tara i uka ma ge konamulea na prister, a vuhuna i malamala hateka a maki ni taba ne BAKOVI DAGI.
29“A bakovi ni ru here ni gi ratapile, nahea ni gi kona mule, ni gi rabalaki.
30 c“A maki ni kani ni varo na hania, i manga a vuana vit, a vutuna kai, mu ru kadolu na galesi ge ravulu. Muri mu habia nau e BAKOVI DAGI, a galesi ge taku i malamala na matagu. 31Bara bakovi tara i ngaru ni kona mule ranga maki ni kani nga, ge konamulea na mapana, ge ru langa tabu ranga ( ). 32Bara o tahoka a sipsip o a bulmakau i ravulu, o ru herea ge taku, ge malamala lakea ne BAKOVI DAGI. 33Ra kanirau o habia nau i kamumu o i hale, naha ni kuloia. Pali bara o kuloia ra kanirau nga, rua varago ru malamala, i uka ma ni gi kona mule.”
34A vinara nga e BAKOVI DAGI i habi ne Moses na lolo e Sinai, ge longo e huriki a Israel, ri gi ramai.
Copyright information for
BNP